ಹೊಸ ನಿರ್ದೇಶಕರ ಪ್ರಯತ್ನದ ಚಿತ್ರ ಅಳಿದು ಉಳಿದವರು ಟ್ರೈಲರ್​ ಬುಧವಾರ, ನ.20 ರ ಸಂಜೆ ಬಿಡುಗಡೆಯಾಗಿದೆ. ನಿರ್ದೇಶಕ, ನಟ ಪವನ್​ ಕುಮಾರ್​ ತಮ್ಮ ಅಧಿಕೃತ ಯೂಟ್ಯೂಬ್​ ಚಾನೆಲ್​ ನಲ್ಲಿ ಚಿತ್ರದ ಟ್ರೈಲರ್​ ಅನಾವರಣಗೊಳಿಸಿದ್ದಾರೆ.
ನಿರ್ಮಾಪಕ ಅಶು ಬೆದ್ರ ಮೊದಲ ಬಾರಿಗೆ ನಾಯಕರಾಗಿ ಕಾಣಿಸಿಕೊಂಡಿರುವ ಅಳಿದು ಉಳಿದವರು ಚಿತ್ರವು ಒಂದು ಪ್ರಸಿದ್ಧ ಟಿವಿ ವಾಹಿನಿಯ ಕಾರ್ಯಕ್ರಮದ ಸುತ್ತ ಸುತ್ತುತ್ತದೆ. ಕಾರ್ಯಕ್ರಮದ 100ನೇ ಸಂಚಿಕೆಯನ್ನು ರೂಪಿಸಲು ಎದುರಾಗುವ ತೊಂದರೆಗಳು, ವಾಹಿನಿಯ ಟಿಆರ್​ ಪಿಗಾಗಿ ಪಡುವ ಪಾಡು ಇವುಗಳನ್ನೆಲ್ಲ ಭಾವನೆಗಳ ಏರಿಳಿತಗಳೊಂದಿಗೆ ಚಿತ್ರವು ನಿರೂಪಿತವಾಗುತ್ತದೆ.

ಟ್ರೈಲರ್​ ನಲ್ಲಿ ಏನಿದೆ?
ಸ್ಕ್ರಿಪ್​ ಬರೆಯುವ ದೃಶ್ಯದ ಮೂಲಕ ಪ್ರಾರಂಭವಾಗುವ ಟ್ರೈಲರ್​ ವಾಹಿನಿಯ ಕಾರ್ಯಕ್ರಮವನ್ನು ರೂಪಿಸಲು ಎದುರಾಗುವ ಸವಾಲುಗಳು, ನಾಯಕನ ತಾಕಲಾಟ, ಎರಡು ದೃಶ್ಯಗಳಲ್ಲಿ ನಾಯಕಿಯ ಹಿತ ನುಡಿಗಳು, 100ನೇ ಸಂಚಿಕೆಯನ್ನು ತಯಾರಿಸಲು ನಡೆಸುವ ಸಿದ್ಧತೆಗಳು ಇವುಗಳನ್ನು ಟ್ರೈಲರ್​ ತೆರೆದಿಡುತ್ತದೆ. ಟ್ರೈಲರ್​ ಹೆಚ್ಚು ವಾಹಿನಿಯ ಕಾರ್ಯಕ್ರಮದ ಸಿದ್ಧತೆಯನ್ನು ಹೆಚ್ಚು ತೋರಿಸುತ್ತದೆ. ಆಕರ್ಷಕ ಶೀರ್ಷಿಕೆಯ ಮೂಲಕ ಭಾವನೆಗಳ ಏರಿಳಿತವನ್ನು ತೆರೆದಿಟ್ಟಿರುವ ಟ್ರೈಲರ್​ ಚಿತ್ರದ ಬಗ್ಗೆ ಭರವಸೆ ಮೂಡಿಸಿದೆ.

ನಟ ರಕ್ಷಿತ್​ ಶೆಟ್ಟಿ ಮಕ್ಕಳ ದಿನಾಚರಣೆಯ ದಿನ ನ.14 ರಂದು ಚಿತ್ರದ ಫಸ್ಟ್​ ಲುಕ್​ ಅನಾವರಣಗೊಳಿಸಿದ್ದರು. ಟ್ರೈಲರ್​ ನ್ನು ಆದಷ್ಟು ಬೇಗ ಬಿಡುಗಡೆಗೊಳಿಸುವುದಾಗಿ ಚಿತ್ರತಂಡವು ಪೋಸ್ಟರ್​ ನಲ್ಲಿ ಹೇಳಿಕೊಂಡಿತ್ತು. ಇದಕ್ಕೂ ಮುನ್ನ ಕಹಿ ಸಿನಿಮಾ ನಿರ್ದೇಶಿಸಿ ಭರವಸೆ ಮೂಡಿಸಿದ್ದ ಅರವಿಂದ್​ ಶಾಸ್ತ್ರಿ ಈ ಚಿತ್ರದ ನಿರ್ದೇಶನ ಮಾಡುತ್ತಿದ್ದು ಚಿತ್ರಕಥೆಯನ್ನೂ ರಚಿಸಿದ್ದಾರೆ. ಅಶು ಬೆದ್ರ ವೆನ್ಚರ್ಸ್​ ಮತ್ತು ಪಿವಿಆರ್​ ಪಿಕ್ಚರ್ಸ್​ ಸಂಸ್ಥೆಗಳು ಚಿತ್ರದ ನಿರ್ಮಾಣದ ಹೊಣೆಯನ್ನು ವಹಿಸಿಕೊಂಡಿವೆ.
ಬೆದ್ರ ನಿರ್ಮಾಪಕರಾಗುವ ಜೊತೆಗೆ ಮೊದಲ ಬಾರಿಗೆ ಅಳಿದು ಉಳಿದವರು ಚಿತ್ರದ ನಾಯಕನಾಗಿಯೂ ನಟಿಸಿದ್ದಾರೆ. ಸಂಗೀತ ಭಟ್​ ಬೆದ್ರ ಅವರಿಗೆ ಜೋಡಿಯಾಗಿದ್ದಾರೆ. ಬೆದ್ರ ಅವರು ಈ ಹಿಂದೆ ಸಿಂಪಲ್ಲಾಗಿ ಇನ್ನೊಂದು ಲವ್​ ಸ್ಟೋರಿ ಚಿತ್ರದ ನಿರ್ಮಾಣ ಮಾಡಿದ್ದರು.

ಚಿತ್ರದಲ್ಲಿ ಪ್ರತಿಭಾವಂತ ನಟರಿದ್ದಾರೆ. ಬೆದ್ರ, ಹಿರಿಯ ನಟ ಅತುಲ್​ ಕುಲಕರ್ಣಿ, ಲೂಸಿಯಾ ಖ್ಯಾತಿಯ ಪವನ್​ ಕುಮಾರ್​, ಬಿ ಸುರೇಶ್​, ಸಂಗೀತಾ ಭಟ್​, ಅರವಿಂದ್​ ರಾವ್​ ಮುಂತಾದವರು ತಾರಾಗಣದಲ್ಲಿದ್ದು ಚಿತ್ರದ ಬಗ್ಗೆ ಕುತೂಹಲ ಹೆಚ್ಚುವಂತೆ ಮಾಡಿದೆ. ಮಿಥುನ್​ ಮುಕುಂದ್​ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ.

ಅಳಿದು ಉಳಿದವರು ಟ್ರೈಲರ್​ ಭಿನ್ನ ಕಥೆಯನ್ನು ತೆರೆದಿಡುವ ಮೂಲಕ ಗಮನ ಸೆಳೆದಿದೆ. ಹೊಸ ನಿರ್ದೇಶಕ ಮತ್ತು ನುರಿತ ಕಲಾವಿದರನ್ನು ಹೊಂದಿರುವ ಚಿತ್ರವು ಮುಂದಿನ ತಿಂಗಳು ಡಿಸೆಂಬರ್​ 6 ರಂದು ತೆರೆಗೆ ಲಗ್ಗೆ ಇಡಲಿದೆ.
ಹೆಚ್ಚು ಕಮರ್ಷಿಯಲ್​ ಅಂಶಗಳನ್ನು ಹೊಂದಿಲ್ಲದಿರುವ ಈ ಚಿತ್ರವನ್ನು ಪ್ರೇಕ್ಷಕ ಪ್ರಭು ಎಷ್ಟರ ಮಟ್ಟಿಗೆ ಸ್ವೀಕರಿಸಲಿದ್ದಾನೆ ಎಂಬುದನ್ನು ನೋಡಬೇಕಿದೆ.